كشكول أفلام 203

سمعت كلامكم و جدا استمتعت بالنقاش و ما قدرت ما اشارككم رأيي. فتحملوني اذا سمحتوا او اسحبوا اذا طويل مره 😂
ستيڤن جراهم:
شخصيته سهل مره انها تكون مبنيه على شخصيات شهيره شفناها بافلام و مسلسلات كثيره. بمعنى انك سهل تشوفها و تقول اوه هذا يذكرني بذا و ذا. لكن، اداء ستيفن جراهم هنا كان فعلا منفرد و مميز، مع ان مشاهده قليله نسبياً لكنه فعلا تمكن من الشخصيه و عطاها صورة كامله. ممثل ممتاز و بارع جدا.
آنا باكوين:
اكثر اداء علق معي من بين كل الشخصيات المساعدة. مشاهدها كانت تعتمد على تعابيرها، طول الفلم عندها جملتين الظاهر، و يالله كيف ذا الجملتين كانت قويه. الشي الي عمله سكورسيزي هنا مره جريء علاقتها بالقصه جدا عاطفيه و لو عطاها حوارات اكثر كانت بتكون جدا سهله و فقط قصه تزيد عاطفتنا للشخصيات. لكنهم (المخرج، الكاتب، و آنا) كانو فعلا بارعين انهم يوصلون كل هذا بمشاهد صامته ما تتعدى اربع دقائق.
جيسي بليمونز:
هذا واحد من الممثلين الي لو يطلع اسمه بأي عمل لازم اشوفه. احب حضوره و كيف انه هنا بمشهد بسيط و حوار ممكن يعتبر كوميدي فقط عطاني كل شي ابي اعرفه عن الشخصيه. تمنيت يكون له مشاهد اكبر مع ان الدقيقتين ذي تكفي تثبت براعته.
جو بيتشي:
ممثل معتزل، يرجع و يقدم واحد من اقوى ادواره. طبعا بيتشي كان عظيم من بداية الفلم الى نهايته. لكن انا بتكلم عن حاجتين بس. الحاجه الاولى و الي تعتبر من ابرز مشاهد الفلم الي ما تتعدى خمس ثواني حتى، بينه و بين دي نيرو. ناظروا بعض و كل شي وصل.
الحاجه الثانيه علاقة شخصيته مع بيجي بنت فرانك، نظراته و تقولك قصته، كيف رغبته انه يكون اب، و محاولته انه يخفي الجانب المرعب منه الي واضح من بداية الفلم بدون ما يسوي ولا شي. تجنبا للحرق بس بقول مكان المشهد نظراته للرقصه وقت حفلة فرانك. هنا انا قلت اوكي ما احس احد بيتعدى أداءه بذا الفلم.
ال باتشينو:
علاقتي مع ال باتشينو متوتره. احبه و استمتع لما اشوفه و مع ذلك كثير انقده على اشياء. و هنا ما اقصد أفلامه الكلبه بالالفيه الثانية، بس احيان أداءه يكون مبالغ بس ماعلينا. ال كانت شخصيته مليانه كاريزما و قوه، و هنا هو يبدع. ما اعتقد فيه ممثل بيكون مثالي لهالدور اكثر منه. ذكي سريع بردوده و راسه حار. هذي اشياء محد يختلف ان ال مثالي فيها. لكن بعلق على الكاميستري بينه و بين دي نيرو، كل المشاعر الي ممكن تعبر عن علاقتهم كانت بيد شخصية ال فقط، لسبب بذكره لما اتكلم عن دي نيرو، و يالله كيف كلها توصل بدون تعب و تكلف. و لما الممثل يقدر يوصل كل هذا و تحسه طبيعي هنا يكون ممتاز جدا كيف لو ان شخصيته اصلا حاره و يبالغ بكل شي. ال كان اسطوري بأدائه.
دي نيرو:
يأدي دور شخصيه ماعنده مشاعر، ولا عنده رأي لكن بلحظه بس تنفجر المشاعر على تعابيره و تختفي بلحظه ثانيه. ممكن اصعب دور بالفلم و دي نيرو فعلا تمكن منه. إبداعه باخر الفلم خلاني زيه، مشاعري جلست مكتومه لين طلعت الكريدتس. جلست ابكي لين انتهت.
سكورسيزي:
اخر فلم لسكورسيزي كان silence. هذاك الفلم شفته بالسينما، و كانت من اجمل التجارب الي علقت معي. سكورسيزي يقدر يخليك تعرف شخصياته بمشاهد ما تتعدى ثواني، و بذا الفلم الي فيه ستين الف شخصيه و هذا كان أصعب شي ممكن يسويه. و فعلا نجح و كان تقديم او ظهور الشخصيات لأول مره من ابرز لقطات الفلم (تقديم جيمي هوفا و اول مشهد لجو بيتشي خصيصاً).
فلم ثلاث ساعات و نص و شخصيات بالهبل و يظل جاذبك و شادك طول وقت عرضه، التنويع بالفلم من الدسامه بنصه الاول الى مشاهد العنف و الى المشاهد الطويله و مشاهد ما تتعدى عشر خنس ثواني اوصللك كل شي. فعلا عمل عظيم.
اعتذر طولت بس مشكلتكم ما عزمتوني👀