كشكول أفلام 211

يا هلا والله بالاحباب

عارف ما ودكم تكثرون كلام عن افلام تلفاز١١ وعرضها على نيتفليكس لكن اعتقد حدث بالاهمية يستحق نعطيه وقته ونتناقش فيه قد ما نقدر. يعني بالنسبة لي ما فيه الا وسطي وسومياتي اللي فعليا تستحق المشاهدة، وللاسف نفس ما توقعت استمرار الفهم الخاطئ للرمزيات في اغلب الاعمال يعني مشعل الجاسر اشوف عنده بوتنشل خرافي لكن لازم يفك نفسه من شغلة الرمزيات اللي بالغصب والمشاهد الكريبي اللي ما هي الا فهم خاطئ للابداع وللتوضيح ما عندي مشكلة مع الافلام اللي فيها رمزيات بس تكون مجرد وسيلة يستعين فيها المخرج عشان يوصل افكاره مب غاية يبني عليها الفيلم ونفس الكلام على المشاهد “الكريبي” ناهيك عن النجاح ما يقاس بهالاعمال يعني يمكن اشطح شوي بس خذلك على سبيل المثال انجح عمل سعودي،خليجي طاش ما طاش احد ركائز نجاحه التمثيل والبساطة اللي وصلت لكل الشعب العربي ونفس الشي مع مسامير وحتى تلفاز نفسهم انجح اعمالهم (التمساح، خمبلة، الخلاط) كلها اتسمت بالبساطة.

وبخصوص زياد العمري للاسف يا عبد الله العشوان ما اعتقد انه كان يمزح وبدليل طلع بمقطع ثاني ماخذ الموضوع تحدي وكأن بينا صراع.
في الختام الرواد في هالجمال كانوا يذمون على الجيل السابق انهم ما يتقبلون النقد وعقولهم متحجرة واخشى عليهم من تكرار نفس غلطة الجيل السابق، في النهاية تقبل النقد سواء من فني او متابع بسيط يساعد في تطوير المجال.