حلقة خاصة: حدث سامسونج 2020

علقت في تويتر يوم شفت الحلقة تأخرت ما نزلت هنا 🙂

وهذا التعليق كامل

اول شيء شكراً على الحلقة بداية الحلقة ضعت وانتم تقولون نوت بلس رحت اتأكد فيه بلس ولا لا وحتى يوم عدلتوا الخطأ بدر للحين معزم على البلس

بالنسبة للمؤتمر ما اعرف هل كان مباشر عشان كذا طلع متواضع كذا او لا حتى جودة الصورة كان فيها مشكلة طبعاً اعتقد ما كلفوا على انفسهم لأنهم عارفين كل شيء معروف عن الاجهزة في المؤتمر

أهم شيء في المؤتمر صار بالنسبة لي هو ربط اجهزة SAMSUNG ببعض شيء جميل وطبعاً كان هذا الشيء موجود من زمان لكن تم تطوير بعض الاشياء فيه

التعاون مع Microsoft شيء جميل ودائماً استفيد منه وغير التعاون مع XBOX الي يحب الالعاب راح يكون ممتاز له

اعلان دعم الاجهزة بتحديثات للنظام لمدة ٣ سنوات بدل من سنتين ثم تصبح تحديثات امنية هذا شيء مهم تم الاعلان عنه في المؤتمر

بالنسبة للنوت التطور في القلم ممتاز وسرعه الاستجابه فيه والاضافات الي زادت بدعم تطبيقات اكثر المشكلة متعودين على القلم على اليمين لكن الحين راح يكون على اليسار 🙂 , الجوال اعتبره افضل جوال في السوق لكن اهم شيء يكون بمعالج سنابدراغون , طبعاً كل سنة هو الافضل من نوت ٨ 🙂

بالنسبة ل التابلت اخيراً حجم كبير استخدم tap S6 ومعجب فيه جداً الاضافات على S7+ ممتازة مثل البطارية الي نسيتوا تتكلمون عنها 🙂
مكان الكاميرا السيلفي تغيير كان على شكل افقي صارت على شكل عامودي واستجابة القلم الي صارت اسرع وبشكل واقعي اكثر طبعاً شكل القلم تغيير عن التاب S6 والمغناطيس الخلفي للقلم تغيير وصار اقوى ويعتبر الجهاز انحف تابلت في السوق

الDEX التطور فيه سريع و SAMSUNG مهتمين فيه كثير بالنسبة لاستخدامه لاسلكياً او انك تقدر تشغله في الشاشة وتستخدم الجوال في نفس الوقت شيء جميل جداً

بالنسبة للساعة انا اشوف انها جميلة وخاصة انهم غيروا في شكلها اكتف ١ و اكتف ٢ ممتازة لكن مهم تغيير الشكل بين فترة وفترة شفت تغريدة تقول ان حساسات اكتف ٣ افضل من اكتف ٢ وهذا تحسين ممتاز واضافة دعم ايماءات اليد فكرة جميلة واضافة تخطيط القلب وتتبع السقوط مهم واعتقد الاضافات هذي هي الي زادت في سعر الساعة واختلف معكم ان اكتف ٢ نفس مواصفات اكتف ٣ لأن فيه اضافات جديدة على الساعة

والحين بالنسبة للبدز لايف سماعات الفاصوليا 🙂 صراحة انا من التسريبات وانا متحمس اشوف كيف تستخدم وكثير يمدح لبسها وانها ثابته ومريحه فالاذن وكل شيء فيها ممتاز لكن استغربت ان العزل فيها كثير يقول انه سيء وكأنه بدون عزل لكن اعتقد السماعة تحتاج تحديث عشان يتحسن العزل ننتظر ونشوف وش راح يصير لأن بالنسبة لي الاهم في السماعة العزل وهذا الي خلى سعرها يزيد عن سماعاتهم السابقة

اما الحين نجي لجوال المستقبل فولد زي فلب هذا الجهاز من اول نسخة تم الاعلان عنها وانا استمتع في كل شيء عنه لأني اشوف انه ممكن يتطور كثير ونقدر نصير نستخدم جوال وتابلت في نفس الوقت والتطور من فولد ١ الى فولد ٢ من ناحية الشاشة الخارجية الي صارت كاملة صارت شيء رهيب وغير الشاشة الداخلية الي اختفت القذلة الي كانت تنرفز شوي غير التطوير في مفاصل الجهاز كان فيه تسريبات انه راح يكون بقلم لكن ما صار هذا الشيء ان شاء الله نشوفه فالمستقبل

نجي للايكو سستم الي تطوره SAMSUNG من فترة بربط اجهزتها ببعض بسهولة ودون اسلاك شيء جميل نشوف اهتمام اكثر من هذي الناحية

بالنسبة للاسعار للاسف بالنسبة للنوت مرتفعة وهي تجي مع معالج اكسنوس بالنسبة للمعالج سنابدراغون
لكن شد انتباهي بدر يوم قال النوت صار اغلى من الايفون !
الايفون ٥١٢ جيجا ٤جي سعره ٦١٩٩ وهذا معه خصم 10% ولا سعره الاساسي 6899
النوت الترا ٥١٢ جيجا ٥جي سعره ٥٤٩٩

ما اعرف النوت كيف صار اغلى

وحتى مع هذا الشيء لا يبرر رفع الاسعار من SAMSUNG