ببداية الحلقة تكلمنا عن حدث لعبة
Resident Evil Village
وتكلمنا عن الديمو حقها وعن ألعاب ثانية مثل
Death Stranding
Little nightmares 2
Hitman 3
وغيرها من الالعاب
بعدها تكلمنا عن اخر الاخبار
واخر فقره ناقشنا ردود المستمعين
الحضور فايز، سعد، علي، عبدالرحمن (قحص)
5 تعليقات
الله يعطيكم العافيه . قبل قتره في البث حق سعد في رمضان قلتله اني العب فيفا بشغف حسيت انه مستغرب وكنت احسن اني نوب اني العب فيفا وسبحان الله وقع في الفخ و صار يلعبها . ولكم تو ذا club هههه
طبعا انا مدمن صراحه الاسبوع هذا جبت اليت ٣ ب ٢٤ فوز باقي مباراه عن اليت ٢ . خسرتها مع الاسف
عندي سؤال نقاشي بسيط . ليش ما زال البلاستيشن ٥ منقطع من السوق مع ان له تقريبا ٤ شهور من الاصدار . المفروض انه مغرق السوق الان
السلام عليكم رجعنا للتعليق معاكم بعد شهور من الغياب. صح اني وقفت تعليقات لكن ماوقفت استماع البودكاست المميز. مبروك ابو يوسف طيحتك في عالم فيفا اللي اذكر اني حذرتك لاتتعمق فيه هالعالم غرييييب على قد ماتدمن اللعبة على قد ماتكرهها. لكن طالما أنك لسه ماتعمقت في اللعبة فوضعك في السليم.
عموما واحد من أسباب رجوعي للتعليق هو المستفز (علي) ياخي هالادمي يعرف يستفزني صدق. للامانه انه رفع ضغطي الحلقات الماضية بزيادة. احس ان علي هو النقيض تماما مني. وباذكر لكم بعض استفزازاته لي. اولا الخبر اللي يقول ان فريق تيم نينجا انتهت سلسلة نيوه بالنسبة لهم وما راح يكون فيه جزء ثالث. الأخ علي فرحان بالخبر ويقول احسن. ومايدري اني قلبت البيت عزاء بالخبر الزفت هذا. نيوه سلسلة عظيمة جدا بالنسبة لي واعتبرها شخصيا من أفضل العاب الاكشن اللي لعبتها الجيل الماضي. والأخ جاي بكل برود يقول “احسن” يوووووووه ياهو رفع ضغطي يوم قالها. والنقطة الثانية اشوفه مشخصن الأمور مع سي دي بروجكت. اوكي متفق معاك ان سايبر بنك قمامة اذا صح التعبير. لكن تجي وتقول ان المطور هذا منفوخ وان الناس يبالغون في مدحهم عشان لعبة وحدة عندهم!! المشكلة لمن جاه سؤال من واحد من المستمعين عن ذا ويتشر. الأخ اللطيف علي جاوب وبكل برود “انا مالعبتها فما اقدر اعطيك رأيي”. لا ياشيخ!! دامك مالعبت ذا ويتشر ليش جالس تسفّل في المطور طيب. ولا انت داخل على سايبر بنك عشان الكلام اللي جا عن اللعبة بس وداخل مدرعم ومطفي نورك. ارجع واقول انا اتفق معاك في رأيك عن سايبر بنك لكن كلامك عن المطور صراحة علامة استفهام. والمصيبة الاعظم بالنسبة لي انه يعتبر لعبة walking simulator عظيمة. يارجال اي عظيمة والله ياهي لعبة فاشلة بكل المقاييس. اللعبة عبارة عن ساعتين تقريبا بس. وباقي الوقت انت قاعد تكرر اللي سويته في هالساعتين لعبة منفووووووخة ومايقهرك الا اللي يقول لعبة سابقة وقتها (يواد قوم يواد) واحد أعطيتوه اكبر من حجمه وفتح له استوديو والنتيجة لعبة فاشلة. شايف كيف ياعلي حتى انا اعرف استفز.
سلام عليكم، سألتكم قبل حلقتين ونسيتوه، فحبيت اذكركم فيه.
السؤال عن فيفا ٢١ ، بعد مانزلت نسخة بلايستيشن٥ صار تحسن كبير فالرسم لكن تدهور بالاطارات خصوصا اذا لعبنا اكثر من واحد اوفلاين، واذا وصلنا ل٤ لعيبة تطيح الاطارات بشكل مزعج جدا لدرجة انك تحس اللعبة تعلق اذا جت هجمة وصار فيه تصادم بين اكثر من لاعب، هل واجهتوا المشكلة؟ او تقترحون حلول اجربها؟
مثنى حبيبي فيه أكثر من حل للمشكلة.
اولا روح للاعدادات من اللعبة وبعدين اعدادات التحكم وطفي ميزات الهيبتيك فيدباك ومميزات الاهتزاز.
اذا ما انحلت المشكلة روح للتلفزيون اللي تلعب عليه وطفي كل الخيارات اللي تتعلق بنعومة الحركة او اي خيار ثاني له علاقة بحركة الصورة.
اذا ما انحلت مالك الا الصبر لين ينزل تحديث. لان فيه ناس نفعت معاهم هذي الحلول وفيه ناس ماينفع معاهم شي. فانتظر التحديث اللي غالبا ماراح يعدل شي لان هالشركة اي شي ماله علاقة بالالتمت تيم لاتتوقع انهم يعطونه وجه. وبالرغم ان المشكلة منتشرة لكن الدعم الفني مطنش ونزل تحديثين للان والتحديث الثالث في الطريق ولاجابوا طاريها. كل تحديثاتهم تعديلات للقيم بلي وحل مشاكل وقلتشات الالتمت
السلام عليكم سمعت الحلقة وصادفت اني توني خلصت Death Stranding صراحة اللعبة مميزة جدا وفيها أفكار جميلة القصة جيدة والقيم بلاي حقيقة ممتاز صحيح بعض المرات يكون فيه ملل ، حركة الأون لاين باللعبة غريبة ومميزة عجبني جدا وودي أشوف العاب زي كذا. الجرافيكس والرسوم ياساتر لا يعلى عليها خصوصا نسخة البي سي أسطورية إذا جهازك يقدر عليها Ultra 4K 60fps تجربة ماتتفوت، فيها مشكلة بسيطة الـ Textures باللعبة حسيت انه ممكن تكون أفضل من كذا بكثير لو نزلوا High resolution texture pack مثلا! يمكن مايبونها تصير أفضل بكثير من نسخة الـ PS4 😂. فيه مشكلة رفعت ضغطي حقيقة مالاحظتوا الأغاني باللعبة دايم ماتشتغل الا اذا قربت لمكان وجهتك؟ حرفيا تشتغل و بعد 5 ثواني تطفي حرام والله تروح عليك الأغاني لأنها إبداع.
بشكل عام اللعبة صعب تنصح فيها لأي أحد كل مانصحت لواحد وقلت جربها قالي لا مخيسة وطفش وتوصيل طلبات ومن هالكلام وبالأخير تلقاه لاعب Horizon Zero Dawn أكثر لعبة مملة وماقدرت أكملها .
و يعطيكم ألف العافية.