كشكول ألعاب 270

يعطيكم العافية ..
بدايةً التعليق موجه لـ علي لأسباب كثيرة أهمها اسمي بتويتش Abanafe وهو بيعرف الباقي 😂

الشغلة الثانية التعليق بيكون طويل شوي والله يعين اللي بيقراً
شخصياً متابع البودكاست من 2013 تقريباً، وسبب ذِكري لهالشيء لأني من ذاك الوقت الى اليوم هذا أسمع قسم الألعاب كامل واستمتع مع اني أبداً ماني قيمر وكثير ألعاب تتكلموا عنها ما اعرفها أبداً، لكن أحياناً يشدني أبحث عن لعبة وأشوفها من باب الفضول، وقد سبق وذكرت في تعليق قديم اني مدمن متابعة تخاتيم وستريمات لناس تلعب لكني ما ألعب، وكذلك ذكرت متابعتي لألعاب السولز وبلودبورن .. وشغلة مضحكة، في كلامكم عن بعض الألعاب اتخيل جو اللعبة وعالمها بناءً على وصفكم وكثير يكون خيالي بعيد عن اللعبة لما أتابع مقطع لها بعدين.
هذا كله مقدمة للشيء اللي ودي أتكلم عنه، واللي هو لعبة (ميتل جير سوليد)، من كثر كلامكم عن أجزاءها جاني حنين أشوف لها جيم بلاي لسبب وهو ان هذه اللعبة لي ذكرى معها ايام بلايستشن1 وهو الجهاز الوحيد اللي كان عندي، اللعبة كنت أذكر منها جزء ماقدرت أتخطاه بحكم عمري صغير وقتها وكذلك اللعبة اتضح لي ما كانت بسيطة لشخص ماله بالانجلش ويلعب على عماها، المهم شفت تختيم جميل لها على يوتيوب، واللي ضحكني ان الجزئية اللي ماقدرت أتخطاها كانت في بداية اللعبة بعدما يطلع سنيك المصعد ويروح السطح ومن السطح ينتقل للمرحلة اللي بعدها، أنا مرحلة السطح كانت آخر عهدي بها 😂.
طيب نجي للجد، الحقيقة تفاجأت من جودة اللعبة على وقت اصدارها أتكلم عن القصة والحبكة وحتى اللعب نفسه كيف كانت جزئية التجسس معمولة بحيث تكون قريبة من الواقع وايضاً جزئية ثانية جداً فاجأتني في مواجهة سنيك مع وولف بالسنايبر كيف خلّو فكرة القنص يكون فيها احساس قريب من الواقع بحيث ماتكون يد اللاعب ثابتة وتهز شوي، وفيه شغلة رهيبة في مواجهة أحد البوسس اللي هي تبديل اليدات، فعلاً لعبة سابقة وقتها وما ألوم أحد لو شفته مغرم بها، وأشعر بندم داخلي اني مالعبتها بوقتها واني ما عشت التجربة الحلوة هذه، وتحمست أشوف باقي الأجزاء وودي أسمع منكم أو توجيه لمتابعة الأجزاء كـ جيم بلاي بس عشان القصة.
عندي سالفة ثانية بخصوص ألعاب العالم المفتوح لكن بخليها بوقت ثاني، ويعطيكم ألف عافية.