كشكول ألعاب 295

السلام عليكم شلونكم عساكم بخير ،،،،
عندي تعقيب بخصوص كلام خالد بخصوص كاليستو
فيه اشياء ذكرها خالد مهي بموجودة باللعبة مثل عنصر الاستكشاف ( البسيط ) و ايضا سالفة ان لازم تقطع يدينه ورجلينه عشان مايجيك العدو ( مثل ديد سبيس )
ماقول ان خالد قاعد يجيب اشياء من راسه لكن المقصد ان ممكن خانه التعبير ببعض النقاط وحبيت اعدلها لا اكثر بحكم اني مختم اللعبة اكثر من مرة وجايب البلاتينيوم فيها من نفس اليوم
وبخصوص سلبيات اللعبة بالنسبة لي اشوف تقييماتها مستحقة وممكن اكثر من اللازم وبذكر لكم سلبياتي مع اللعبة و اتوقع خالد مع قراءته لهالكومنت بيكون مخلص اللعبة ف ودي اعرف رأيه عن بعض النقاط الي بذكرها من ناحية السلبيات ،،،،
اولا والنقطة الاهم اللعبة لعبة رعب لكن عنصر الرعب فيها معدوم ويكاد لايذكر ومافيه الا اخر تشابتر الي فيها شوي من الرعب وممكن السبب يرجع لنوعية الاعداء بهذيك المنطقة ( اتوقع خالد يعرف اي عدو اقصد )
اللعبة لعبة اكشن وبعيدة كل البعد عن كونها لعبة رعب صحيح ان تصميم بعض المناطق مرعبة لكن جو اللعبة ونوعية الاعداء نفسها مافيهم اي ذرة رعب وبالعكس تماما تحسها لعبة اكشن مب رعب و احد الاشياء الي اضافت رعب اكثر لديد سبيس هي عنصر الغموض وبكاليستو الغموض معدوم
ثاني نقطة عدم تنوع الاعداء اللعبة مافيها غير خمس اعداء طول اللعبة وفيه بعض الاعداء اشكالهم الي تتغير فقط لكن ضرباتهم وقتالهم هي نفسها
ثالث نقطة عدم تنوع اسلحة الميلي كومبات ماعندك غير سلاح واحد ميلي طول اللعبة مع ان اللعبة تعتمد بشكل كبير على الميلي كومبات وبالإضافة لذلك ماعندك غير ضربتين ميلي
رابع نقطة مشاكل تقنية مثل الذكاء الاصطناعي عند الاعداء واحيانا يقفطونك مع ان فيه حاجز بينكم ونفس الكلام على بعض ضربات الاعداء الي توصلك مع ان فيه حاجز بينكم
خامس نقطة ترتيب االاسلحة باللعبة سيئ جدا ويوم تبدل للاسلحة او تستخدم عناصر الشفاء ياخذون وقت اكثر من اللازم ودايم تنكب لدرجة مايمديك تستخدم الهيل بوقت القتال بحكم انه ياخذ حول ٥-١٠ ثواني
سادس نقطة القصة ركيكة والشخصيات سطحية وبناء الشخصيات من اسوء مارأيت بالفترة الاخيرة يعني حتى ماتعبوا نفسهم يعطونك كم دقيقة يعرفون بالشخصيات او يعطونك نبذة عنهم
سابع نقطة طور الـ Security difficulty ( اصعب صعوبة باللعبة ) ممل جدا وغير ممتع بتاتا والسبب يرجع لثقل التحكم باللاعب وكثرة الاعداء ببعض المناطق والقوة المبالغ فيها عند بعض الاعداء لدرجة مايعطونك الفرصة انك حتى تتفادى العدو الي قدامك والي زادها سوء الدوج والميلي كومبات النايم
ثامن نقطة و الي اعتبرها من اكبر سلبيات اللعبة الي هو الدوج التعبان ؛ حرفيا الدوج باللعبة ممكن اسوء دوج شفته بحياتي
يعني لدرجة احيانا تسوي دوج للعدو ويجيك انميشن الدوج ومع ذلك تجيك ضربة العدو ومب مرة ولا مرتين تصير حرفيا كل شوي تصير الا نادرا
تاسع نقطة هي تحكم اللاعب
التحكم اثقل من اللازم ومب سلس ابدا على مثل هالنوعية من الاعداء
تذكرون هيبليد ؟ نفس التحكم بالضبط سواء كان بالميلي كومبات او بثقل اللاعب
والثقل دايم ينكبك بالاماكن الي فيها اعداء كثير او ضد الاعداء الي عندهم رينج اتاك
والنقطة العاشرة والاخيرة اللعبة خطية اكثر من اللازم ومافيها عنصر الاستكشاف نهائيا فيها فقط مكانين سريين وكلهم متشابهين يعني ياليتهم بهالمكانيين حطوا لك رسالة او اي شي تعطي عمق للور اللعبة اكثر وياليت عطوك اماكن اكثر تستكشفها ومب بالشرط تكون كثيرة لكن على الاقل يحطون لك فيها رسايل مثل ريزدينت ايفل عشان تعطي عمق للور اللعبة
وطبعا بخصوص الايجابيات كلها تقريبا اشياء بالساوند دزاين والجرافيكس لا اكثر وممكن الاداء الصوتي مع ان الحوارات كانت حواق
ف اشوف تقييمات اللعبة على هالسلبيات منطقية جدا وممكن اكثر من اللازم مع ان واضح من نهاية القصة انهم ناوين يسوون جزء ثاني لها و اتمنى بالجزء الثاني تتعدل كل هالمشاكل
و اخيرا اتمنى الاستاذ خالد ماياخذ بخاطره او يزعل لان نيتي من كتابة السطر الاول مب اني اكذب كلامه او اطلع بهالصورة لا بالعكس تماما بس حبيت اوضح بعض النقاط بحكم اني محلل كل شي فيها
و اعتذر عن الإطالة و شكرا