كشكول ألعاب 300

السلام عليكم ،،، مادري ليش الحلقة مب نازلة بالموقع عشان نقدر نعلق لكن دامها مب موجودة بعلق هنا بحكم انها اخر حلقة نزلت بالموقع
عموما ، قاعد العب فاينل بار و ياالهي ياكمية المتعة الي فيها والمحتوى الجبار والضخم الي فيها ، هذه اللعبة مصنوعة بحب وتقدير وعشق لجميع محبين وعاشقين سلسلة فاينل فانتسي
اللعبة لعبة رذم وفيها اكثر من 100 شخصية و اكثر من 500 موسيقى من اجزاء سلسلة فاينل وبعض العاب سكوير الثانية ، تحس انك قاعد تلعب جميع اجزاء السلسلة بجزء واحد فقط وشريط حياتك يمر قدامك وتتذكر كل الايام الجميلة الي عشتها مع اجزاء السلسلة ، والمتعة الحقيقية تكمن بالذكريات نفسها وماعتقد اذا شخص مالعب الا كم جزء من السلسلة راح يحس بنفس الشعور الي قاعد احسه لان مثل ماقلت المتعة نفسها تكمن بالذكريات وماراح تكون عندك هالذكريات اذا ماكنت لاعب اجزاء السلسلة ، قاعد اكتب لكم هالكومنت ومشاعري قاعده تتدفق وقاعد اتذكر كل ايامي الجميلة مع هالسلسلة الايقونية
اللعبة ماخذه تقييم مرتفع جدا ولو بيدي كان عطيتها اعلى من كذا لانها بلا شك من امتع الالعاب الي لعبتها بحياتي واذا كان اي واحد فيكم محب لسلسلة ف ارجوك ارجوك عطها فرصة وهذا وجهي اذا ماحسيت بنفس الشعور الي حسيته

السلام عليكم شلونكم عساكم طيبين ،،،،
تعليقي بيكون طويل شويتين لاني بعقب على ردي السابق بخصوص الدن وليش اشوفها محبطة و ايضا بقول رأيي المفصل عن فورسبكن ف اتمنى تتحملوني واعتذر عن الإطالة مقدما
………………………
انا شخص لاعب كل العاب السولز وجايب البلاتينيوم بأغلبها
وبعطيكم خلفية بسيطة عن تجاربي معها دامكم سألتوني بالحلقة السابقة

ديمون السولز الكلاسيك خلصتها لكن ماجبت البلاتينيوم فيها واشوفها لعبة تمشي الحال

دارك سولز 1 ماجبت البلاتينيوم فيها و اشوفها لعبة نايمة

دارك سولز 2 جبت البلاتينيوم فيها ولاعبها حول 280 ساعة و اشوفها لعبة مقبولة

دارك سولز 3 جبت البلاتينيوم فيها ولاعبها مرتين و اشوفها لعبة جيدة

بلودبورن جايب البلاتينيوم فيها ولعبت الاضافة واشوفها لعبة جيدة

سيكيرو جايب البلاتينيوم فيها واشوفها لعبة ممتازة ،،،،

الدن كنت متوقع منها الكثير وخصوصا بعد قالوا انها عالم مفتوح ” وعنوان جديد ” وحطوا تحت هالكلمة مليون خط لاني برجع لها بعدين ، لكن للاسف طلعت دارك سولز 4 مع عالم مفتوح وماونت وكان بالإمكان افضل مما كان

مشاكلي مع اللعبة 👇🏻👇🏻

1 – تصميم الدنجنز باللعبة متكررة والالغاز الي فيها مملة

2 – الموسيقى باللعبة مهي بذاك الزود ومب بمستوى العاب السولز السابقة

3 – قتال الزعماء كان يمشي الحال وماكان فيه الا قودفري الي استمتعت بقتاله وكان رائع البقية كانوا يمشون الحال وفيه بعضهم جيدين ( ايه قاتلت ميلينا ودقيت خشمها )

4 – العالم المفتوح مهو بسيئ لكن مب مبتكر ومافيه شي جديد ابدا ، الاستكشاف فيه جيد وتوزيع بعض الاعداء والزعماء جيد لكن مع تقدمك راح تحس بالملل وهالشي واجهته بعد النصف الاول من اللعبة

5 – سرد القصة باللعبة كانت ولازالت مشكلتي الازلية مع العاب السولز ومع الدن صار مبهم وعشوائي اكثر بحكم انه صار عالم مفتوح ، انا ماقول حط لي مليون كتسينز عشان افهم القصة عادي نوع بالسرد وخله واضح اكثر مثل سيكيرو

6 – اللعبة عنوان جديد لكن كأنها دارك سولز ٤ وهذه مشكلة كبيرة باللعبة ، ليش تقولي ” عنوان جديد وعالم مفتوح ” و اخرتها انميشنز حركة اللاعب والكومبات وميكانيكس كثيرة نفسها نفس الي بدارك سولز ٣ ؟

عندي مشاكل ثانية مع اللعبة لكن ماودي اطول كلامي اكثر وللمعلومية حتى مع كل هالمشاكل اللعبة مب سيئة ابدا يعني لو بقيمها بعطيها 7 او 7.5 بالكثير.
عموما هذه مشاكلي مع الدن وليش اشوفها محبطة مب عشاني انجلدت او عشاني ماعرف العبها وماقول ان مافيه ناس كرهوا اللعبة او يشوفونها سيئة عشانهم مايعرفون يلعبونها لكن انا مب من ضمن هالاشخاص ، مثل ماذكرت بالبداية جايب البلاتينيوم باغلبها ومخلصهم كلهم
والناس اذواق مثل مايقولون.
………………………..
بخصوص فورسبكن وبعد الموجة الكبيرة الي صارت معها اقدر اقول ان فورسبكن من الالعاب الي ينطبق عليها مثل ” لاتحكم على الكتاب من عنوانه ” ،،،

فورسبكن جتها موجة هجوم كبيرة ومن اشخاص مالعبوا اللعبة ولا ناوين حتى يلعبونها بس يبغون يركبون الموجة لا اكثر وعلى شي تافه مثل حوار مدته 15 ثانية ولايعكس جودة الحوارات الباقية ولو بتدقق وتستقعد بتلقاه بأغلب الالعاب لكن هذه ضريبة انك تصطاد بالماء العكر وللمعلومية هاي فاي رش الي الكل قايم فيها عندها مثل هالنوع من الحوارات لكن محد جاب طاري حواراتها ومثل ماقلت هي مجرد موجة وركبوها ،،،

تجربتي مع فورسبكن بتكون مقسمة لثلاث اقسام وبتكون طويلة شوي وبحاول اختصر قد مااقدر عشان ماطول عليكم

القسم الاول بيكون عن القصة والحوارات

القسم الثاني بيكون عن الكومبات سستم والزعماء والاعداء

القسم الاخير بيكون عن العالم المفتوح والنشاطات / المهمات الجانبية الي فيه
……………………………

1 – القصة والحوارات ،،،،

القصة تاخذ وقتها بالبناء وذروة القصة ماراح تشوفها الا بنص اللعبة ويوم توصل لذروة القصة راح تشوف قصة محترمة و احداث تشدك وبتطور رائع وعلاقة ممتازة بينها وبين السوار وحوارات متنوعة بينهم منها المضحك ومنها المحزن , القصة مابالغ اذا قلت انها من افضل قصص الايسكاي الي شفتها بالفترة الاخيرة ، طول الوقت و انت تسأل نفسك
” كيف جتني هالقوة ؟ ” ” ليش الكل خايف من قوتي ؟ والعديد من التساؤلات الاخرى الي مالها إجابة ، لكن يوم تعرف الإجابة راح تنصدم من مدى عمق قصة اللعبة وجودتها ، وهالشي مب مقتصر على القصة وفقط بل حتى تطور فراي والمواقف الي تمر فيها والخيارات المصيرية الي تنجبر تختارها والمعاناة والندم الي تمر فيها بسبة هالقرارات وفي مثل هاللحظات راح تلاحظ بعض النزاعات بينها وبين السوار او حتى احيانا تكون مساواة لفراي وتقليل الذنب الي على عاتقها لان اغلب القرارات الي تتخذها تكون قرارات صعبة ومؤلمة وهذه احد الاسباب الي تخليني اعتبر علاقة فراي والسوار من اروع العلاقات الي شفتها بالفترة الاخيرة ، ماودي اتكلم عن القصة عشان ماحرق لكن القصة ككل كانت ممتازة وللاسف راكبين الموجة شوهوا سمعتها عشان حوار مدته لايتجاوز ال 15 ثانية.

2 – الكومبات سستم ،،،

اللعبة لعبة اكشن اربيجي وتعتمد بشكل كامل على السحر سواء كانت للضربات القريبة او الضربات البعيدة وعندك اربع انواع من السحر وتمثل بعض عناصر الطبيعة
الارض – الماء – النار – البرق
لكل شجرة مهارات مهارات خاصة وايضا لكل مهارة نوعين من الاستخدام وحدة لفراي والثانية للسوار ، و ايضا بعض المهارات يمديك تستخدم فيها للضربات القريبة والضربات البعيدة ( مثل السيف للضربات القريبة والرمح للضربات البعيدة لمهارة النار ) ، ولكل شجرة تطوير مهارات تساعدك بالشفاء او بزيادة قوتك بطريقة او اخرى ( Buff – Debuff ) , ولكل شجرة تطوير مهارات تساعدك بالتنقل ، مثل المراوغة والاختفاء وترك نسخة وهمية بدالك و ايضا الدبل جمب بمهارة البرق ، او زيادة السرعة والتسلق بأماكن عالية بالهوك بمهارة النار ، او القفز لمسافات طويلة بمهارة الارض ، او الطفو بالسماء بمهارة الماء الخ… ، القتال باللعبة عبارة عن مزيج مابين السحر و الباركور والكول داون بالكومبات مختلف عن اغلب العاب الاكشن المعتادة ويعتمد على الكومبوز مب على الوقت
( كل ماسويت كومبوز اكثر كل ماصار عداد الكول داون اسرع )
وهالشي يعطيك دافع انك تسوي كومبوز اكثر ، ومابالغ اذا قلت ان القتال باللعبة من امتع القتالات الي شفتها على الاطلاق ومتنوع بشكل مخيف ومستحيل تحس بذرة ملل فيه ، ولكل عدو نقطة ضعف ونقطة مناعة خاصة فيه ف مايمديك تقاتل بشكل عشوائي ومايمديك تسبم طول الوقت وتبقى على مهارة وحدة ولا مهارتين طول اللعبة وهذه احد اكبر ايجابيات اللعبة
مب مثل اغلب الالعاب الي يحطون لك مليون مهارة و اخرتها وجودها مثل عدمها.
( مثل ويتشر ٣ وسايبربنك على سبيل المثال )

3 – العالم المفتوح والمهمات / النشاطات الجانبية ،،،،

عالم اللعبة ضخم جدا وفيه قرابة الـ 50 منطقة ومقسم على اربع مناطق رئيسية
جونون – فيسوريا – براينوست – افواليت
والمناطق الاربعة كل وحدة فيهم لها توجهها الخاص ومادري اذا فيه كثير لاحظوا هالشي لكن لاحظت ان كل منطقة لها توجه يعكس هوية الزعيم او المملكة نفسها وبشرح لكم وش اقصد الحين

1 – براينوست مملكة تمثل القوة والإرادة وتعكس هوية زعيم المنطقة ف لذلك لونها بالاحمر

2 – افواليت مملكة تمثل العدل والقانون وتعكس هوية زعيم المنطقة ف لذلك لونها بالازرق

3 – فيسوريا مملكة تمثل الثقة والحكمة والمعرفة وتعكس هوية زعيم المنطقة ف لذلك لونها بالاخضر

4 – جونون مملكة تمثل المحبة والمساواة ف لذلك لونها بالابيض

من ناحية التوجه الفني ف سمعة لومينوس سابقتهم ومايحتاج اوصف لكم مدى روعة وجمال التوجه الفني وتصميم العالم ، و ايضا التنقل بالعالم مابالغ اذا قلت انه امتع و اسلس وافضل تنقل شفته على الاطلاق ، عندك طرق كثيرة بالتنقل ومتنوعة
عندك التزلج وعندك الباركور وعندك التسلق بالهوك وفيه بعض المهارات الي تساعدك بالتنقل مثل ماذكرت بالجزئية السابقة ، و ايضا عالم اللعبة مب شكلي وبس فيه بعض المناطق تلقى لها ملف يتكلم عن وش الي صار بهالمنطقة وتعطي عمق اكثر للور اللعبة
على سبيل المثال في احد المناطق فيه ملف معين يتكلم عن معركة قلعة براينوست الي تعتبر اكبر و اضخم معركة صارت في احداث تطهير الراديج ويتكلمون عن وش الي صار بهالمنطقة وكيف ان فيه جنرالة اسمها ” كاليستا كين ” قدرت توقف هالحرب وتنقذ العديد من الابرياء ، وفيه ملفات كثيرة ثانية وتتكلم عن بعض الاشياء الي صارت بالعالم سواء كانت رسائل من جنود او وصف لبعض المناطق الي قبل الدمار او حكاية عن بعض الحروب.
من ناحية النشاطات والمهمات الجانبية عندك اشياء كثيرة تسويها بالعالم
عندك بوسز موزعين بالعالم ( عددهم 39 )

وعندك بوسز الدنجنز ( عددهم 13 )

وعندك بعض السوبر بوسز ( عددهم 4 )

وعندك ايضا بعض البوسز مايطلعون الا بالعواصف ويجون معهم اقوى الاعداء والعواصف باللعبة تجيك بشكل عشوائي وانت تمشي بالعالم والعاصفة باللعبة كل ماطولت فيها كل مانقص الهلث حقك

وعندك الفلاشبكات ( 20 فلاشباك ) وهي عبارة عن تحديات متنوعة تخلصها ( احمي بعض الاشخاص – اوصل للنقطة المحددة – اقتل كل الاعداء ) وكل ماخلصتهم اسرع كل ماعطوك نقاط اكثر

وعندك المعسكرات – القلاع – القرى – الكهوف
صحيح ان جميعهم نفس الهدف ( اقتل كل الاعداء )
لكن الاعداء الي فيهم مختلفين والجوائز الي تاخذها مختلفة احيانا تكون كنوز و احيانا تكون ملفات

وعندك بعض المناطق الي تصور فيها ( 50 منطقة ) وكل ماتصور 5 او 10 مناطق توصلها لشخص معين ويعطيك اشياء تفيدك بالفوتو مود سواء كانت فلاتر او ايطارات

وعندك قطط موزعة بالعالم ( 20 قطة ) وكل وحدة فيهم لها توجهها الخاص وكل ماتصيد وحدة يعطونك خلفية بسيطة عنها ، على سبيل المثال عندك قطة اسمها ” ميا ” وهالقطة كانت وظيفتها قبل التفشي هي انها توصل اوامر سايلا لقواتها وحسب ماذُكر ان هالقطة احد القطط المقربة لسايلا ، والجميل بالموضوع ان كل القطط الي جمعتهم راح تلاقيهم بالكوخ حقك

وبخصوص المهام الجانبية اغلبها بسيطة لكن عندك بعضها تعتبر جيدة وفيها بعض القصص الجيدة لا اكثر ولا اقل
……………..
واللعبة طبعا مب كاملة وخالية من السلبيات فيها بعض السلبيات او بعض الاشياء الي كان ودي انها تكون افضل من كذا

عندكم الرسوم باللعبة مهي برسوم جيل جديد ابدا وبعض التكستشرز فيها متواضعة وممكن حتى فف 15 الي نزلت قبل 7 سنوات و الي من نفس الاستديو و من نفس المحرك افضل كانت افضل منها بهالناحية

وعندكم الاضاءة باللعبة تعبانة وبعضها مؤذي للعيون وتحسها من جيل ال PS3 كثر ماانها معطوبة

وعندكم الدنجنز والاكواخ تصاميمهم كلها متشابهة وكان ودي على الاقل بكل منطقة من المناطق الاربعة الرئيسية هالاكواخ والدنجنز تصاميمها يكون مختلفة شويتين

ممكن كل السلبيات الي ذكرتها ترجع للميزانية و اعتقد لو دفعوا عليها اكثر كانت بتتحول من سلبيات الى ايجابيات

و اخيرا وليس اخرا اللعبة بالنسبة لي لعبة رائعة ولو بقيمها تقييم رقمي ممكن اعطيها 8 او 8.5 حتى

ادري اني طولت عليكم بزيادة وممكن هالتعليق يكون اطول تعليق بتاريخ كشكول 😂 لكن تنرفزت يوم شفت الموجة الكبيرة الي كانت على اللعبة ف قلت لازم انصفها و اتكلم عنها
و اعتذر عن الإطالة و شكرا