كشكول ألعاب 313

السلام عليكم
ادري اني احب اسولف واجد ودايم اكتب تعليقات طويلة وممكن البعض ينزعج من هالشي ، ولكن انا بطبعي احب اكتب واجد واحب اشارك اراءي بمختلف البودكاستات ، ف تحملوني واعتذر عن الإطالة مقدما.
عندي اضافة على كلام نواف وخالد بالحلقة الي راحت
فف ١٦ كانت من الالعاب الي متحمس لها لأسباب عديدة ، اولا لانها من سلسلتي المفضلة ، وثانيا لانها من تيم يوشي بي الي ماسكين 14 ، والي بالمناسبة فيها اعظم قصة بالسلسلة وفيها فيلنز اعتبرهم من افضل الفيلنز على الاطلاق هذا غير ان جودة كتاب تيم يوشي بي بمستوى اخر عن باقي كتاب سكوير ، وهذه احد الاسباب الي خلت قصة 16 ممتازة ، بخصوص ثيم قصة 16 ف ماشوفه توجه جديد ابدا لان النزاعات السياسية والخيانات كانت موجودة في فاينل تاكتكس و في 12 و 14 ( وتحديدا بنهاية اكسبانشن ريلم ريبورن وايضا في اكسبانشن هفنزوورد ) وحتى 16 تشبه بداية 12 بشكل كبير ، شفتم الخيانات والتويستات الي كانت بالبداية ؟ هذه حرفيا موجودة في 12
و ايضا السوداوية كانت موجودة بتايب زيرو الي كان يعتبر جزء فرعي و ايضا كانت موجودة بالسادس ، ماقول ان اللعبة مب ماخذه من قيم اوف ثرونز لان حتى يوشي بي ( منتج 16 ) قال انه مستلهم من قيم اوف ثرونز ، ولكن الافكار نفسها كانت موجودة قبل والقصص الناضجة والنزاعات السياسية والسوداوية كانت موجودة باجزاء قبل ، ولكن الفرق بينهم وبين 16 ان 16 صارت دموية اكثر ، الكاتب حق 16 هو مايهيرو وودي اتكلم عنه شويتين ، مايهيرو كان مصمم قبل مايكون كاتب ، هو كان مصمم الباتل سستم في 12 الي بالمناسبة يعتبر اكثر نظام قتال معقد بالسلسلة ( القامبيت سستم ) و اكثر نظام يحتاج تخطيط وكثير من الفانز كرهوا 12 بسبة هالنظام المعقد مع اني اعتبره افضل نظام بالسلسلة ، ومايهيرو ايضا كان مصمم المناطق في فاجرانت ستوري ، و ايضا مخطط المهام في فاينل تاكتكس وبالمناسبة جميع هالاعمال المخرج فيها كان شخص اسمه ماتسونو وماتسونو ذا دايم القصص الي يكتبها ويخرجها يطغى عليها الجانب السياسي يعني تقدرون تقولون مثل الي في 16 ، ف لذلك مايهيرو
تعلم من ماتسونو نوعية القصص الي يكتبها وتحول من مصمم الى كاتب وبدايته بالكتابة كانت في 14 وتحديدا بريلم ريبورن بسنة 2013
وقصة ريلم ريبورن كانت ممتازة ، ولكن احد اكبر سلبياتها هي المهمات الي دايم تقتل رتم متعة اللعبة وتصاعد ونزول الاحداث ، وهذه بالمناسبة كانت اكبر مشاكلي مع 16 ومستغرب الصراحة ان كيف كرر نفس الغلطة مرة ثانية مع ان هالمشكلة ماكانت موجودة في اكسبانشن هفنزوورد الي كانت من كتابته ايضا ، وعلى طاري هفنزوورد ، هفنزوورد كتابتها كانت رائعة بشكل لايوصف وبالنسبة لي اشوفها افضل من كتابة 16 وهذا وهي كقصة ماتعتبر افضل قصة في 14 حتى ، وهذا الى حد ما احبطني شويتين ، ان كيف كاتب مثل مايهيرو قدر يقدم قصة رائعة في هفنزوورد وتعلم من اغلاطه في ريلم ريبورن ووصل لذروته بالكتابة ثم بعدها كرر نفس الاغلاط الي كانت موجودة في ريلم ريبورن
لاتفهموني غلط ، قصة 16 جيدة ، ولكن كلامي ان مقارنة في هفنزوورد الي كانت من كتابته ف هي مب بمستواها ابدا ولا تقربها حتى ، ولكن اذا كنت شخص ماقد لعب 14 ثم لعبت 16 ف ماراح تفرق معك ابدا وبالعكس راح تنبهر اكثر ولكن اذا كنت لاعب 14 ثم بعدها لعبت 16 ، بيجيك احباط شويتين ، لان احد اكبر مميزات كتاب تيم يوشي بي ان دايم مع كل مشروع لهم يتطورون من ناحية الكتابة ، شفنا هالشي مع مايهيرو يوم تطورت كتابته بهفنزوورد ، وشفنا هالشي مع ايشيكاوا الي تطورت كتابتها في شادوبرينقرز ، والي بالمناسبة اعتبرها افضل قصة بالسلسلة ومن افضل القصص الي شفتها بحياتي ، وحتى ايشيكاوا نفسها اعتبرها افضل كاتبة بسكوير وبالراحة ، حرفيا الي سوته في شادوبرينقرز كان شي مجنون وفجر راسي ، واتمنى الصراحة انها تمسك كتابة 17 لان حرفيا كتابة شادوبرينقرز بمستوى اخر عن اي قصة بالسلسلة
ف المقصد من كلامي ذا كله ان النزاعات السياسية والسوداوية والقصص والشخصيات الناضجة كانت موجودة باجزاء قبل ولكن
الفرق بينها وبين 16 ان 16 جمعت كل هالاشياء ببكج واحد و ايضا تعتبر دموية اكثر.
ودي اشرح قصة 16 شويتين عشان اعطي فكرة للمستمعين و ايضا
لـ علي بحكم انه مالعب اللعبة
قصة اللعبة عن قارة اسمها فاليثيا وهالقارة تضم بلورات موزعة على عدة ممالك ، وهالبلورات هي عبارة عن جبال زجاجية ، والغرض من هالبلورات ببساطة هي استخدام السحر ، لان ببساطة شعب قارة فاليثيا يعتمدون عليها بشكل كامل في حياتهم اليومية ، سواء كان في استخدام الماء لرش الارض ، او لإشعال النار في الطبخ و الحدادة ، او باقي الاستخدامات اليومية المعتادة والي مايمديهم يعيشون بدونها ، طبعا البلورات تستخدم فقط من قبل الاشخاص الي ماعندهم القدرة على استخدام السحر فقط ، اما حاملين السحر والدومينانت بإمكانهم يستخدمون السحر دون الحاجة الى امتلاك البلورات ، ولكن بالوقت نفسه حاملين السحر يعتبرون منبوذين في فاليثيا او بمعنى اخر يعتبرون ” عبيد ” مع ان في يوم من الايام كانوا اسياد والكل كان يحترمهم بسبب مقدرتهم على استخدام السحر دون الحاجة الى البلورات ، ولكن في احد الايام إنقلبت الآية واصبحوا عبيد عند سكان فاليثيا ، ولتمييز مستخدمين السحر عن غيرهم حطوا اوشام عليهم ، ومع كل طفل ينولد لازم يفحص و ان كان الطفل عنده المقدرة على استخدام السحر ف بيحطون عليه وشم ، و هالوشم عبارة عن حبر سام و اذا احد حاول يشيله بيموت على طول.
قارة فاليثيا مقسمة على عدة ممالك ومقسمة على قسمين
قسم يسمى ” ارض الرماد ” وقسم اخر يسمى
” ارض العاصفة ”
قسم ارض العاصفة تحته اربع ممالك
1 – روزاريا بالغرب ، وهي بالاصل تشكلت من مجموعة مستوطنات على يد عائلة نبيلة تسمى ” روزفيلد ” وتحديدا تحت يد وحكم إلوين روزفيلد
2 – امبراطورية سانبريك بالشمال ، وهي تعتبر اكبر و ارقى مملكة بالقارة ، وهي تحت يد سيلفستر لاساج ، و احد الاسباب الي خلته يمسك الحكم ليست سمعته او نفوذه ، بل ابنه دومينانت باهاموت ، لان من الاساس المفترض إمبراطورية سانبريك تكون تحت يد مجلس الشيوخ وليس تحت يد سيلفستر لوحده
3 – دالمكيا بالجنوب ، وهي تضم خمس ولايات ، وهي تحت حكم مجموعة وزراء يحكمون المملكة وكلهم تحت قيادة رئيس الوزراء ، ولكن بالوقت نفسه ومع ان هوغو كوبكا مجرد مستشار اقتصادي ولكنه يعتبر الآمر والناهي بالمملكة والسبب يرجع لأمتلاكه دومينانت تيتان
4 – مملكة الأيرن بالساحل الغربي ، وهي تحت حكم الارثوذكسية البلورية ، وهي عقيدة دينية تنبذ من يستخدمون السحر سواء كانوا حاملي السحر او الدومينانت ، ومسمى ” الارثوذكسية ” او
” الأرثوذكس “، هي بالأصل من اللغة اليونانية ، و ” الارثوذ ” تعني
” القويم ” ، و ” دوكسا ” تعني ” الاعتقاد او الرأي ” وبمعنى اخر تعني
” الرأي القويم ” او ” الايمان المستقيم ” وهي بالأصل مذهب من المسيحية.
اما في قسم الرماد ف مافيه الا مملكة واحدة و الا وهي مملكة والود وهي تحت حكم بارناباس ثامر دومينانت اودين ، وهي مملكة منعزلة عن باقي الممالك ، و ارضها اشبه بساحة معركة ، وحاكمها بارناباس دائما ماكان هدفه هو توسيع نفوذ مملكته الى ارض العاصفة ، وايضا تمكن بارناباس من ترويض الاورك وباقي الوحوش الذين اجتاحوا ارضه ليصبحوا جنودا له بدل من ان يكونوا اعداء له.
بتشوف بالقصة انواع المشاعر ، بتشوف الحقد وبتشوف الكره والحب وبتشوف الحزن والخلاص وبتشوف الي يبي ينتقم وبتشوف الاستعباد بأبشع الطرق ، وبتشوف اربع ممالك بينهم نزاعات سياسية وكل واحد فيهم عنده نظرته الخاصة في كيف انه يحكم بلده ، عندك واحد مايفكر الا بالسلطة والمال والكل يخاف منه عشانه دومينانت فقط ، وعندك واحد يهتم بتوسع نفوذه ومناطق مملكته لدرجة انه ماعنده مشكلة يكسر الاتفاقات الي بينه وبين الممالك من اجل انه يتوسع بنفوذه ، وعندك واحد مايهتم بشعبه ويستعبد حاملين السحر بأبشع صورة لدرجة انه وصل لمرحلة انه يسوي تجارب على الاطفال ويعذبهم واحيانا حتى يخليهم مواد غذائية للاورك والوحوش الي مخليهم جنود له من الاساس.
وهذه هي قصة اللعبة ببساطة ، قد تبدوا انها قصة عظيمة ورائعة ولكنها ليست كذلك ، فيها بعض المشاكل المزعجة والي نقصت من قيمتها بالنسبة لي ولكن بشكل عام لازالت جيدة
وبالمناسبة ياخالد ترا اللعبة فيها تشوكبو ولكن موجود بمهمة جانبية
وهالشي تقريبا موجود بأغلب اجزاء فاينل ، التشوكبو يكون شي جانبي ومب موجود بالقصة ولازم تبحث عنه بنفسك ، والتشوكبو والموقلز هم من الاشياء الرئيسية الي تلقاهم بكل جزء لفاينل وهم الشيئين الوحيدين الثابتين في كل جزء لفاينل ، اما باقي الاشياء ف تتغير مع كل جزء
و احد الاشياء الي تخليها تتغير ان مع كل جزء رئيسي تقريبا المطورين والكتاب والملحنين والمصممين مختلفين واحيانا حتى المحرك يكون مختلف ، يعني عندك 16 الحين كانت تحت يد تيم يوشي بي حقين 14 و 11 ودراقون كويست 10 ( يعني بإختصار العاب سكوير الممو )
وعندك ريميك السابع تحت يد تيم كيتاسي الي يعتبر اكبر قسم بسكوير والي فيه عمالقة من المصممين والكتاب والملحنين من ايام الثمانينات والتسعينات وبنفس الوقت ماسكين الاجزاء الرئيسية + السبينوفز من سلسلة فاينل فانتسي و كينقدوم هارتس وساقا وذا وورلد ايندز وذ يو
وبعيدا عن فاينل عندكم تيم يو مياكي حقين دراقون كويست و نير واكتوباث ترافلر وبريفلي ديفولت و ايضا حتى موظفين استديو لومينوس حقين فف 15 وفورسبكن يوم تقفلوا انتقلوا عندهم
وعندكم تيم نيشيكادوا حقين سلسلة مانا ويشاركون ببعض الريماسترات والبورتات و ايضا العاب الجوالات
ف الشغل عند سكوير دايم يكون مقسم والكل عارف شغله وهذه احد الاسباب الي تخلي سكوير تنزل العاب واجد بسنة وحدة و ايضا هذه احد الاسباب الي تخلي فاينل فانتسي سلسلة متغيرة مع كل جزء.
ادري اني طولت بالكلام ولكن مثل ماذكرت بالبداية دايم احب اكتب واجد واشارك اراءي بمختلف البودكاستات ، والي يعجبني فيكم ان دايم تقرون التعليقات بشغف ماتقرونها من اجل القراءة نفسها ، وخصوصا علي ، دايم استمتع يوم اشوفه يقرأ تعليقات المستمعين ويتفاعل معها وهذه احد الاسباب الي خلتني احب اشارك واجد.