كشكول ألعاب 342

السلام عليكم شباب،
اسمحوا لي أسولف معكم عن أفضل شهر مرّ عليّ من ناحية الألعاب. بحكم إن أصحابي ما يهتمون بالألعاب اللي ألعبها، مثل حالة نواف ههههههه.

الشهر هذا، وبحكم إن ألعاب الجيل الحالي أغلبها مملة، قررت أرجع للماضي وأتشجع آخذ تجارب جديدة. وكانت البداية مع العظيمة Yakuza 0. صراحة، من أفضل الألعاب اللي لعبتها من ناحية القصة. حبيت الشخصيتين: المجنون ماجيما والرجال كيريو. اللعبة هذه أعتبرها درس في تصميم المهام الجانبية، وكيف إنها تفصلك عن القصة الأساسية، لكنها بنفس الوقت رهيبة وتضحك. مع إنهم يسولفون كثير في المهام الجانبية، وهذا شيء غريب وممكن يطفّش.

بعدها، وبفضل الخدمة الأسطورية Game Pass، بدأت ألعب Kiwami 1-2. للأسف، القصة كانت عادية مقارنة بـYakuza 0، لكن الجيمبلاي كان أفضل، خصوصًا في Kiwami 2. الرسوم والجيمبلاي كانوا رهيبين، لكن القصة أحبطتني. وماجيما، مع إني أفضله على كيريو، كنت أتمنى يكون له دور أكبر. صحيح إنه يضحك لما يرجع يضاربك كل مرة، لكن تمنيت وجوده يكون أعمق. المهام الجانبية في الجزئين برضو كانت عادية، لكن كمجمل، السلسلة رهيبة وأنا سعيد إني لعبتها. أتمنى يكون فيه ريميك للجزء الثالث والرابع، لأني ما ودي أروح لـJudgment أو Like a Dragon على طول.

التجربة الثانية كانت من نصيب BioShock. لعبت الجزء الأول والثاني، وكانت تجربة عظيمة خلّتني أنسى Yakuza. اللعبة مزيج رهيب بين الشوتر والرعب، وعالم اللعبة تعلّقت فيه لدرجة ودي أعيش في Rapture. المدينة تحت الماء وأجواؤها وشخصياتها كانت شيء فخم. أندرو رايان لحاله خلاني ألف العالم أدور تسجيلاته. صراحة، اللعبة كانت مذهلة، ومستغرب ليش ما أسمع كلام عنها مثل الجزء الثالث فقط.

الجزء الثاني كان تكملة للعظمة وسيكول أسطوري. شخصية لامب وكيف إنها تمثل وجهة النظر المعاكسة لـأندرو كان شيء رهيب ويعطي القصة بعدًا إضافيًا. الجيمبلاي رهيب، خصوصًا لما تجمع بين القدرات والأسلحة. شيء حلو إن الذخيرة تخلص بسرعة، فهذا يجبرك تغيّر أسلوبك وتنوّع بين الأسلحة والقدرات.

بعدين لعبت الجزء الثالث، لكن للأسف ما حبيته. مليت بسرعة، وأحس البداية كانت غبية جدًا بالنسبة لي. الجيمبلاي كان ممل، ودروب الفريمات أزعجني وخلاّني أترك اللعبة. العالم كان رهيب وخيالي، لكن القصة ما شدتني، فقررت أتركها. يمكن أرجع لها بعدين.

والحين، الرحلة القادمة مع The Witcher 3. إن شاء الله تكون تجربة مميزة زي الألعاب اللي قبل!